![]() |
| A choiva demostra moitas cousas |
Hoxe traigo un artigo moi breve que nin é de Lugo nin é meu, senón que o "roubei" ao arquitecto Carlos Sánchez-Montaña sobre o "escándalo" dos pinchos en Santiago de Compostela. Pois nin escándalo nin rabo de gaita, parece que os famosos "horrores" non son tales, senón algo plenamente operativo.
Déixolles con Sánchez-Montaña:
Hoxe chove con forza en Compostela. E a propia Catedral ofrece unha lección de arquitectura: os seus pichos metálicos lanzan a auga das cubertas, afastándoa dos muros para protexer a pedra.
Xusto enfronte, na mesma praza do Obradoiro, os pichos das gárgolas do Hostal dos Reis Católicos convertéronse en motivo de escándalo.
Resulta paradoxal condenar nunha fachada o que na de enfronte forma parte da tradición construtiva da cidade.
Outra cousa é discutir a medida, a proporción ou a execución. Pero non confundamos o principio coa súa solución concreta.
Compostela é a cidade dos pichos. Unha identidade nacida da chuvia, da pedra e da mestría dos seus construtores.
Ás veces, para comprender a arquitectura, abonda con esperar a que chova.
Carlos Sánchez-Montaña

Unha solución pode ser técnicamente boa e estéticamente impresentable (como o de sodomizar gárgolas)
ResponderEliminarNesa situación é onde se comproba a sensibilidade artística (ademais da pericia técnica) do proxectista.